Khawvela tuifinriatten an lum ber ṭum thleng

EU-a climate monitoring service, Copernicus Climate Change Service chuan khawvel tuifinriatte chuan July thla chhunga an la lum ber ṭum an thleng tih a tarlang. Hei hi Pacific tuipui lama El Niño inṭham mek vang nia sawi a ni.

Tuipui chunglang lum dan chawhrual hi July thla khan khawvel hmar tawp leh chhim tawp lam chu 20.96C a ni a, kum 2023-a lum ber record 20.89C a khum a ni. Tarlan danin, thla hmasa kha khawvel pum huapa July thla lum ber pahnihna a ni pha bawk.

Europe khawthlang lam chuan an ram chanchina June leh July thla lum ber an hmang bawk a, khaw lum leh khaw ro hian chu hmun hrang hrangah ram kang rapthlak tak a thlentir bawk.UK-ah kumin chhunga a vawi ngana tur khawlum zual, "heatwave" an thleng leh dawn bawk a ni.

Tropical Pacific hmun tam zawkah tuipui lum dan chu a la sang hle a, he hmunah hian El Niño boruak chu a inṭham mek a, thla lo awm turah hian a nasat belh zel dawn tih an sawi lawk bawk. Tuipui chunglang a lum hian boruakah lumna leh tui hu a tichhuak tam zual a, hei hian thlipui a tichak zualin, ruah pawh a tam phah hle ṭhin.