Pakistan PM hlui Imran Khan thlawptuten lungawi lohna lantir tum

Pakistan prime minister hlui, jail-a tang mek Imran Khan-a thlawptute chuan tun kar chhunga Imran Khan hi a party, Pakistan Tehreek-e-Insaf (PTI) a ṭhuihruaite hmuh phalsak a nih loh chuan ram pumah lungawi lohna an lantir dawn tih PTI hruaitu chuan a sawi.

Khyber Pakhtunkhwa chief minister Sohail Afridi chuan thuthar lakhawmtute a kawmnaah, kum 73 mi Khan-a chungah thil ṭha lo a thleng a nih chuan prime minister Shehbaz Sharif-a leh a cabinet-a minister pawimawhte chu mawhphurtu an ni ang, a ti.

Cricketer aṭanga politician-a inlet, Khan hi PM a nihna aṭanga no-confidence vote hmanga paihthlak a nih hnuah thubuai hrang hrag siamsak a ni a, kum 2023 aṭang khan thil tisuala puhna hrang hrang avangin Adiala Jail-ah a lo tang tawh a ni. Man a nih avang hian ram chhung hmun hrang hrangah lungawi lohna an lantir nasa hle a, Islamabad-a Democracy Square leh hmun dangah pawh Khan thlawptute leh security force-te an inbeih phah a ni.

Khan hi jail a tan hnuah a chhungte leh a party hruaitute pawh hmuh an phalsak lo nia sawi a ni a, a hriselna pawh a tlahniamin a mit lamah harsatna a tawk a, enkawlna ṭha zawk pekna tur pawh hreksak niin amah thlawptute chuan an sawi. Parliament-a PTI zawng zawngte chuan Ningani hian Adiala Jail-ah Khan-a hi tlawh an tum tih an tarlang. "Kan thil ngen ber chu Imran Khan-a hi hriselna lama enkawlna ṭha ber pek a ni tur a ni," tiin an sawi.

Kum 2024-a man, Khan-a nupui Bushra Bibi pawhin hriselna lam harsatna a nei tih an sawi bawk. An nupa hian enkawlna ṭha tak pe turin sorkar an phut a ni.