Colombia-ah lirnghing vangin mi 69 thi

Colombia khawthlang lamah Thawhṭanni khan magnitude 7.4-a nain lir a nghing a, chhiatna thlenga thi hi mi 69 an tling tawh tih thuneituten an sawi.

Pereira khawpuiah mi 18 an thi a, in chim hnuaiah mi eng emaw zat an la tang tih mayor Mauricio Salazar chuan a sawi. Manizales khawpuiah mi pahnih an thi tih mayor Jorge Eduardo Rojas-a sawi bawk.

He lirnghing hian Colombia bakah a ṭhenawm ram Ecuador pawh a sawi nghing nasa hle a, mi tam tak an chenna in leh building aṭangin an tlanchhuak a ni. Lirnghing chhuahna lai, epicenter hi San Jose Del Palmar, Choco bial chhungah a ni a, he hmun hi Colombia khawpui Bogota aṭanga km 400 vela hla a ni. U.S. Geological Surveysawi danin lirnghing hi leihnuai km 107 vela thukah a inṭan a ni.

Choco Governor Nubia Cordoba chuan social media-ah thuchhuah siamin, an bialah building a chhe nasa hle tih a sawi. Lirnghing tuarte chhan chhuah leh ṭanpui hna hi thawh mek a ni. An rama airport panga chu khar a ni a; Pereira, Manizales, Armenia, Cartago, leh Buenaventura airport-te chu damdawi lam leh sorkar lam thil pawimawh bik atan chauh hman rih a ni.

Thla hnih vel liam taah kha Venezuela-ah ṭum hnih na taka lir nghingin, mi 6,100 chuangin an lo thihpui tawh bawk.