Russia leh Ukraine inbeihnaah mi 7 thi

Russia leh Ukraine chuan zan khat chhunga inbeihna an neihah, civil mi eng emaw zat an thih bakah, mi tam takin hliam an tuar tih tualchhung thuneitute chuan an sawi. Russia ramri Belgorod-ah Ukraine drone vangin mi panga an thi a, mi 24 velin hliam an tuar a, heng zingah hian naupang kum 4 mi pawh a tel niin regional administration chuan a tarlang.

Kharkiv-a Saltivskyi district-a apartment block chu Russia missile-in a kap fuh a, mi pahnih an thi a, mi 13 an hliam tih regional head Oleh Syniehubov chuan a tarlang bawk. Ukraine-a Black Sea port Odesa-a khua leh a chhehvel chu missile leh drone hmanga beih a nih avangin mi pariat an hliam tih tualchhung administration hotu Oleh Kiper chuan a sawi.

Russian missile hian Ukraine-a khuate chu tun hnai kar enge maw zat chhung khan a kap nasa hle a, Moscow chuan Ukraine-a U.S. siam Patriot system, air defense weapon awmchhun ballistic missile kah thlak theihna tur interceptor a tlakchhamna chu a hmang ṭangkai hle bawk a ni. Ukraine president Volodymyr Zelenskyy chuan thla eng emaw zat liam ta chhung khan ram dang, a bikin US chu Patriot system tam zawk Ukraine-a thawn turin a lo ngen tawh a, mipui humhimna atana thil pawimawh tak a nih thu a sawi a ni.