Canada-ah ram kang nasa vangin state of emergency puang

Canada khawthlang province, British Columbia-ah ram kang nasa tak thleng avangin state of emergencypuan a ni a, mi 20,000 chuang hmun himah sawn chhuah an ni tawh.

Inrinni liam ta khan state of emergency hi an puang a, ram kang Bald Range tia an vuah hi Zirtawp aṭang khan a darh chak hle a ni. British Columbia premier David Eby chuan Inrinni khan thuchhuah siamin, "In leh lo leh thil hlu tam tak kan chan a ni. Ram kang chak tak avang hian mi eng emaw zat an tang bawk a ni," a ti. Meiin a hual chhunga la tangte chu thlawhtheihna hmanga lak chhuah hna kalpui mek a ni tih a sawi bawk.

Pathianni thleng khan Bald Range ram kang hian ram hectare 10,341 vela zau a tuam tawh a, thunun theih lohin a la kang mek a ni. Ram kang vang hian Meadow Valley-ah mi pakhat a thi tawh nia sawi a ni a, mahse thuneitute lamin an la nemnghet lo thung. Khua a lum a, a ro bawk avangin ram kang hi a nasain a kangkai chak hle a, meikhu a tam bawk avangin kangṭhelhtute tan pawh hmuh a harsain an duh angin an thawh chak theih loh phah niin an tarlang.

Prime minister Mark Carney chuan X-ah kangṭhelhtute leh chhawmdawlna han hawktute chu an thawhrimna avangin lawmthu a hrilh. Sorkar laipui chu British Columbia sorkar pui tura a inpeih reng thu a sawi a, kangmei nasa tak thleng mahni in leh lo chhuahsan zawng zawngte him taka an in lama an kir leh thuai a beisei thu a sawi.