Hamas-in US rawtna siam kalpui an inpeih

Palestinian firfiak pawl, Hamas chuan US-in a thlawp Gaza Strip-a remna a awmna tura ruahmanna siam chu kalpui an inpeih thu an sawi. He inremna hman a nih theihna tura Israel nawr turin an ngen. Hetih lai hian Israel erawh chuan he inremna siamna tur rawtna thar ber hi an pawm lo tih an sawi thung.

Hamas chuan US president Donald Trump-a din, Board of Peace hnenah ruahmanna thar ber chu an thlawp thu an hriattir tawh a ni. He ruahmanna hnuaiah hian Hamas chuan an ralthuamte chu sorkar thar din tur, Palestinian governing committee hnenah hlan tura tih a ni. Hamas official chuan an pawl bakah, Gaza-a Palestinian pawl dangte chuan inremna hi an kalpui ṭan a, a thawh hnihna kalpui zel pawh an inpeih tih an sawi. Mahse, hemi rual hian ruahmanna siam chu Israel-in a pawm a, an zawm ve phawt an phut thung. Israel prime minister Benjamin Netanyahu chuan kar liam ta khan Board of Peace-in inremna tur ruahmanna an chhawp chhuah chu an pawm lo tih a sawi.

Kar kalta khan Trump chuan Hamas-in ralthuam hlan an remtih chu hmasawnna nasa niin a sawi a, Board of Peace chuan Israel pawhin Gaza hmun tam zawk aṭanga an sipai an lak chhuah tur thu a sawi bawk. Mahse, Board of Peace palai Nickolay Mladenov leh Israel PM Netanyahu te an inhmuh hnuah, Mladenov chuan Hamas-in ralthuam an dah lut vek hnuah chauh Israel chuan a sipaite a lakchhuah tur thu a sawi leh a ni.