Thailand PM-in gun law khauh zawk siam a tiam

Thailand rama mipa tleirawl pakhatin silai a pawng hmehpuah avanga mi pariat an thih leh, mi dang 22 in hliam an tuar hnuah, Thailand prime minister Anutin Charnvirakul chuan gun law khauh zawk siam thar a tiam.

Kar liam ta khan Bangkok khawpui bul, Nonthaburi-a mipa tleirawl kum 14 miin a pi leh pute a kahhlum hnunah, a school kalna Debsirin School-ah mi a pawng kah a, zirtirtu panga kaphlumin a hnuah amah a intihlum zui bawk. Media report chuan hliam tuar zinga mi, zirlai pakhat chu a hnuah a thi leh bawk niin an tarlang.

Pawikhawihna thleng chungchang a sawinaah, PM Charnvirakul chuan vantlang hmun silai ken chhuah chungchangah khuahkhirhna dan khauh zawk siam a ni dawn tih a sawi a, he dan thar hnuaiah hian sorkar official, duty-a chhuakte chauhin silai hi an keng chhuak thei dawn a ni.

Thailand hi South East Asia ram zingah civil mi, silai nei tamna niin, an ram miopui zingah mtd 10.3 vel chuan silai hi an nei a, heng zinga mtd 4 chu phalna nei loa silai kawl nia hriat a ni bawk. Gun law khauh tak neiin, phalna nei loa silai kawl chu kum 10 thleng lung-in tantir theih an ni a; mahse, dan kenkawh ṭhat a nih loh avangin silai nei hi an tam hle thung. Interior minister a nih laiin PM hian silai khuahkhirhna dan hi a lo siam tawh a, ram dang aṭanga silai lak luh khapna pawh siam a ni tawh bawk.