Bangladesh-in August 20-ah President thlang dawn

Bangladesh Election Commission chuan an ram president thar thlanna chu August 20-ah neih a nih tur thu a puang. Kar hnih liam ta, July 24 khan president Mohammaed Shabhuddin chu a hriselna lam ṭhat loh chhuanlamin, a term a hman zawh hmain a bang a ni.

Chief Election Commissioner AMM Nasir Uddin chuan parliament-a acting speaker Kayser Kamal a biakrawn hnuah President thar thlan hun tur hi a tifel a ni. President hi Parliament member-ten an thlang dawn a, August 13 aṭangin Chief Election Commissioner office-ah nomination paper a theh luh theih ang.

Kum 2023 April thla khan Shahabuddin chu Bangladesh President atan, kum nga term turin lak luh a ni. Prime minister aṭanga paihthlak tak, Sheikh Hasina nena inpawh leh inhnaih tak an ni a, hei vang hian kum 2024-a Hasina paihthlak a nih hnuah sorkar thar, prime minister Rahman kaihhruai nen an inkar boruak pawh a ṭha lutuk lo nia sawi a ni. A hriselna lam chhuanlam mah se, sorkar lai nena an boruak ṭhat tawk loh vanga bang nia report a awm, mahse hei hi a dik lo niin a sawi thung.