DR Congo ramah Ebola hri vangin mi 1,800 chuang thi tawh

Democratic Republic of Congo rama Ebola hri leng chuan ziaawm lam a la pan lo a, sorkarin data a tihchhuah thar berah hri kai hi mi 4,000 an chuang tawh a, thihpui mi 1,850 an awm tawh a ni. Expert-te chuan hri kai zat hi sorkarin a chhinchhiah aiin an tam zawk hle an ring bawk.

May 15 khan DR Congo rama Ebola Bundibugyo strain a len thu hi puan a ni a, province panga - Ituri, North Kivu, South Kivu, Haut-Uele leh Tshopo-ahte hri hi a leng mek a ni. Hri kai hmuh chhuah har vang te, enfiahna awm ṭha tawk lo leh, tualchhung buaina thleng reng te, vaccine leh enkawlna damdawi awm lote avangin hri leng hi thunun a la harsa hle nia sawi a ni.

Kum 2014-16 khan West Africa - DR Congo, Guinea, Libera leh Sierre Leone ramah Ebola hri a lo leng tawh a, mi 28,000 chuangin hri hi an kai a, mi 11,000 velin an thihpui bawk. Hemi hnuah tun ṭum hi a len leh nasat ber a ni.

Africa Centres for Disease Control and Prevention (Africa CDC) leh World Health Organisation (WHO) chuan hri darh zel tur venna atana chak taka hma lak a pawimawh thu an sawi. Hri kaite rang zawka hmuh chhuah an nih a, an lak aṭanga kai theite chhui zui te chu ngaih pawimawh a ṭul thu sawiin, frontline health worker-te thuam chak a, hri lenna bialah an mamawh ang hmanruate pek thuai a ṭul tih an tarlang.

DR Congo ṭhenawm, Uganda ramah pawh Ebola hri kai hi mi 20 awm tawhin, mi pahnihin an thihpui tawh bawk.