2023-a Gaza beihnaa thi mi 112-te a rualin vui

Palestinian firfiak pawl, Hamas-in October 7, 2023-a Israel an beih avanga Israel-in Gaza Strip-a beihpui a thlaknaa thi, mi 112 te ruang hmuh chhuah chu Thawhlehni khan a rualin vui an ni.

November 22, 2023-a Israel indo thlawltheihnain Sabra hmuna beihpui a thlaknaah khan mi 300 chuang an thi a ni. An zinga mi 40 ruang chu lak chhuah nghal an ni a, mahse mi dang tam tak ruang chu lak chhuah loin an awm. Kar liam ta khan in chim hrang hrang hnuaia ruang awmte lak chhuah hna hi thawh niin, mi 112 ruang an la chhuak a, ruang 157 erawh hmuh an la ni lo tih Gaza-a Interior Ministry chuan a sawi.

Hamas-ten Israel chhim lam an beihnaah hian khan mi 1,200 vel an thah bakah, mi 251 an man a ni. Israel-in Hamasa beihna chhang let a, Gaza Strip-a beihpui a thlaknaah mi 73,377 an thi tawh niin Gaza-a Health Ministry chuan a tarlang. Ministry-a records department hotu, Zaher al-Waheidi chuan in chim leh chhia hnuaiah ruang 7,400 vel lak chhuah lohin an la awm nia hriat a nih thu a sawi bawk.