Mi bo chungchanga inhnamhnawihte thi tura hremna pek rawt

Bangladesh sorkar chuan prime minister hlui Sheikh Hasina-i'n kum 17 ro a rel chhunga mi 1,500 chuang bo chungchang official inquiry-in a chhinchhiah hnuah, hetiang sualnaa inhnamhnawihte chu thi tura hremna pek a rawt.

Kum 2024-a paihthlak, Hasina hi thuneihna a chan chhungin amah dodaltute security force hmanga beih ṭhinah puh ani a, mi tam tak hren zingah politics lama an hmelma Bangladesh Nationalist Party (BNP) leh Jamaat-e-Islami member-te an tel a ni. Chhui hna thawk tura ruat, commission chuan Hasina rorel chhung hian mi 1,569 an bo nia sawiin, an zinga mi 252 chu tun thlengin an chin hriat an la ni lo tih a tarlang.

Prime minister Tarique Rahman kaihhruai sorkar chuan chin hriat loha mi tam tak bonaa inhnamhawihte hremna pekna tur, Prevention and Remedies for Enforced Disappearance Act chu Parliament-ah pass ngei a ni tur a ni tiin, cabinet chuan draft Thawhṭanni zan khan an pawm tawh a ni. Hetih lai hian PM hlui Hasina hi paihthlak a nih hnuah India ramah tlanchhiain, tun thlengin a lawm a ni. A awm lo chungin Dhaka court chuan kum 2025-a nawrh huaihawtte laka beihna kaihhnawih thubuai hrang hrangah thiam loh chantirin, tihhlum turin a chungthu alo relsak tawh a ni. Hasina hian kuminah Bangladesh ramah kir leh ngei a tum tih a sawi ve bawk.