Nauru thliarkarin an ram hming thlak

South Pacific-a Nauru thliarkar, khawvela ram te lama a pathumna chuan an ram hming chu Republic of Naoero tiin a thlak. President David Adeang chuan ram hming an thlak chu anmahni hnam ṭawng ziak dan leh lam dan nen a inmil tih a sawi. Ram international code pawh NRU atangin NRO-ah thlak a ni ang a, an rama mite pawh 'Nauruan' tih ni tawh loin 'dei-Naoero' tih an ni tawh dawn a ni.

Kumin January thla khan president Adeang chuan an ram hming thlak hi a lo rawt tawh a, an hnam lam dan ang taka ram hming vuah hian an hnam ro, ṭawng, leh nihnate a chawimawi dawn a ni, a ti. Parliament-ah vawi hnih vote an thlak hnuah ram hming thlakna tur hian ram danpui siamrem an remti a, sawi ho hnuah sorkar chuan mipui ngaihdan lak kher a ṭul tawh lo nia sawiin official-in an thlak zui ta a ni.

Mihring 12,000 vel chenna, Naoero hi mihring tam lam tehna aṭangin Tuvalu leh Vatican City te dawtah khawvela ram te pathumna a ni. Germany ramin a awp ṭhin a, a hnuah Australia rorelna hnuaiah awmin, kum 1986 khan a independent a ni.

President Adeang chuan an ram hming thlak a nih thu hi ram dang sorkar leh organisation-te pawh hriattir nghal an ni thu a sawi a, United Nations website-ah pawh an hming thar hian dah nghal an ni tawh bawk.