Japan ramah khawlum lutuk vangin sakei 3 an thi

Japan ramah khawlum lutuk kaihhnawih avangin Tokyo khawthlang lam, Tama Zoological Park-a sakei pathum an thi. An ruang enfiahna aṭangin dehydration bakah an taksa pengte an ṭha lo tih hriat a ni a, hei hi khawlum lutukin a thlen nia ngaih a nih thu sahuan enkawltute chuan an sawi.

Tama Zoological Park enkawltu, Miwa Kosaka chuan hetiang thil thleng hi an vawi khatna tawnna a ni thu a sawi a, nikumah pawh khua a lum viau angin sakei zingah dam loh phah an awm lo niin a tarlang. Sakei thite hi kum thuma upa, Mugi bakah kum 11-a upa Ichigo leh kum 15-a upa Luena te an ni. July 28 - 31 inkar khan an thi a ni. Sakei pathum pawh an dam ṭha lo hle niin an sawi bawk.

Japan ramah khawlum zual thleng mekin, khawpui ṭhenkhatah khaw lum lam chu 40 degree Celsius te a tling a ni. Khaw lum vang hian ram chhunga mi 43,000 vel chu damdawi-inah enkawl an ngaih phah tawh a ni. Humidity sang lutuk chu sakeite tan tawrh a harsa zual niin University of Tokyo-a veterinary medicine professor, Hideaki Karaki chuan a sawi a, hei hian an hriselna pawh a nghawng na hle a ni, a ti.

Toma Zoo-ah hian ramsa chi hrang 260 vel an awm a, an sakei khawite hi sahuan tlawhtute hmuh ber zinga mi an ni. Sakei en duhte tan hian safari-style bus service pawh an siam a; mahse, thla hmasa khan khawlum lutuk avanga sakeite an dam loh avangin bus service hi tihtawp rih a nih thu an puang a ni.

SKorea-ah khaw lum  vangin mi 16 an thi

South Korea ramah pawh khawlum zual a thleng mek a,khawlum vang hian mi 16 an thi tawh. President Lee Jae Myung chuan nimina cabinet meeting neihah, official-te chu khawlum lutuk avanga mipuite harsatna tawh tur veng tura hma la tur leh, power system-te pawh enfiah reng turin a chah.

Pathianni khan an ram chhim chhak lam bialah khaw lum lam hi 42.5 degree Celsius a tling a, kum 122 chhunga an rama khaw lum ni ber a tling. Korea Meteorological Administration chuan Thawhṭannni leh nimin khan Seoul leh Gyeonggi ah heatwave warning a tichhuak a, hei hi heatwave warning a tihchhuah vawi khatna a ni.