Morocco aṭanga Spain-a luh tum mi 67 ramriah an thi tawh

Spain sorkar chuan Morroco ramri bul, Ceuta-ah Morocco aṭanga Spain-a luh tum zinga mi 67 chu ramriah an thi tawh niin Inrinni khan a sawi. Tuipui aṭanga Spain rama luh tum hi nasa takin an pung a, tam tak chu tuipuiah an tlahlum a, ṭhenkhat chu inpawngpekna thlengah an thi bawk.

Kar liam ta chhung khan Morocco aṭang hian mi 60,000 vel Ceuta-ah hian an lut nia sawi a ni. He thil thlen hnu hian Spain sorkar chuan dan loa an ram luh tumte danna tur, meter 500-a thui daidanna an siam tih a sawi.

Inrinni liam ta khan mi ṭhenkhat, tuipui hleuh kaia Cetura-a Tarajal beach thlengte chu sipaiten ramri lamah an hruai kir leh a ni. Spain Interior Ministry chuan Ceuta-a dan loa lut tam zawk chu Morocco lamah thawn kir leh an nih thu a tarlang. Dan loa mi tam tak an luh avangin Ceuta khawpui boruak pawh a tibuai hle tih Ceuta president Juan Jesus Vivas chuan a sawi a, a tam zawk chu thawnkir leh tawh mah se, khawpui boruak chuan ngai a la awh thei lo, a ti.

Morocco aṭanga ruala mi tam tak Spain rama a luh hnuah, Italy chuan Spain nen an inrina chu a khar lailawk. Hei vang hian Spain-a Schengen border-a Europe ram dangte nena an inkalpawhna, thlawhtheihna leh lawng service thlengin a nghawng a ni. Italy foreign minister Antonio Tajani chuan ramri khar hi Italy himna leh, European Union border venhimna turin a ṭul niin a sawi.

Spain prime minister Pedro Sanchez chuan Italy-in Schengen border a khar chu a sawisel a, harsatna an tawh mek laiin mahni hmasial takin thutlukna an lo siam a ni tiin EU Commission leh European Council president-te hnenah a zualko.