Russia-in Telegram founder Pavel Durov manna thupek tichhuak

Russia Federal Security Service (FSB) chuan Nilaini khan messaging platform, Telegram siamtu leh CEO ni bawk, Pavel Durov chu firfiaka chetna puiah puhin manna tur thupek a tichhuak.

FSB chuan Ukraine intelligence leh firfiak pawlten Russia chhung tihbuai a, cyber fraud leh silai hmanga beihna turte ruahmanna atana Telegram an hman ṭhin chu Telegram hian a paihsak duh lo nia sawiin, Durov manna tur hi a tichhuak a ni. Durov man tura thupek chhuah hi Telegram chuan X lama an account official-ah Durov-a'n a kut zunglai a hmuh, middle finger thlalak post-in an chhang leh nghal.

Durov hi Dubai-ah a cheng a, French leh UAE khua leh tui nihna a nei bawk. FSB-in amah an chhui leh an puhna chungchang Russia sorkarin Telegram chu an rama khap hlen a nih theihna atana an chhuanlam sawi mai mai niin a sawi ve thung. Firfiaka chetna lo pui anga puhna thubuaiah Durov hi thiam loh chantir a nih chuan kum 15 thleng lung in tantir theih a ni ang.

FSB chuan kum 2022 aṭang khan Russia ramah Telegram hmang hian pawikhawihna ṭum 1,53,000 a thleng tih an sawi a, heng zingah hian Moscow-a Crocus City Hall beihna leh, defence official pakua thahnate pawh a tel. Vawi 1,50,000 chuang Telegram hnenah content ṭha lo leh danin a phal lohte chu paih turin an ngen a; mahse, an ngenna hi an ngai pawimawh lo niin a tarlang.

President Vladimir Putin rorelna hnuaiha Russia ramah hian social media platform lian, Facebook leh YouTube te khap a ni a, messaging platform WhatsApp leh Telegram te chu hman ni mah se khuahkhirhna siam a ni thung. Telegram hi inbiakpawhna atana an platform hman lar ber a ni.

Kum 2022-a Ukraine leh Russia an indo aṭangin, ram pahnihte hian social media, a bikin Telegram chu pawikhawihna thlen tura hmanrua atana hmangah an inpuh tawn a, an inpuhna hi an pha ve ve thung.