Spain leh France-ah ram kang la ziaawm lo

Spain leh France rama ram kang nasa tak thleng chu ṭhelh hna thawh mek ni mah se a la ziaawm thei lo. Khaw lum zual leh boruak ro avangin kangmei ṭhelh hna pawh a thawh chak theih loh tih an sawi. Thuneitute chuan tunkar tawp lam hian khaw lum zual, heatwave an la tawng leh dawn niin an sawi bawk.

European Union official-te chuan ram kang thleng mek hian November thla tir lam thleng a awh an rin thu ansawi. France ramah ram kang vang hian mi nuai 2.2 vel chu sawn chhuah an ni tawh a, Spain-ah pawh mi nuai 1 dawn chu insawnchhuak tura hriattir an ni leh.

Spain interior minister Fernando Grande-Marlaska chuan khaw lumin zual lam a pan leh dawn avangin ram kang ṭhelh hna thawh mek pawh a hautak zual hle dawn tih a sawi. Spain ram khawthlang lam, Avila province-ah ram hectare 50,000 a zau a kang a, Madrid hmar thlang lamah hmun hnihah a kang bawk a, ram hectare 70,000 vela zau a kang mek. An ram chanchina ram kan nasat ber ṭum an tawk mek a ni.

France-ah pawh kar tawp lama khaw lum zual, heatwave a thlen leh dawn avangin theihtawpin ram kang ṭhelh hna thawh mek a ni. France president Emmanuel Macron chuan hun harsa tak an hmachhawn tih sawiin, khawlum zual lo thleng tur chuan kang ṭhelh hna thawhna kawngah harsatna a thlen thei dawn niin a sawi. Interior minister Laurent Nunez chuan ram kang mek chu a nasain, thli a tleh tel bawk avangin eng ang dinhmun zel nge an tawh dawn sawi lawk a harsa tih a tarlang.

European Commission official chuan kumin April thla aṭanga ram kang thlen chu November thla tir lam thlengin a la thleng thei dawn tih a sawi a, thuneitute chuan France, Spain leh Greece ramah khaw lumin zual lam a pan zel avangin ram kang a thlen belh a hlauhawm zual tiin, warning pawh an tichhuak a ni.