China chhim lamah typhoon Noul a tleh

China chhim lam bial chu nimin zing khan thlipui, typhoon Noul in a nuai. Ruah nasa taka a sur tel bawk avangin mi tam tak sawn chhuah an ni a, train service leh flight eng emaw zat cancel a ni bawk.

China national weather centre chuan an ram huna nimin zing dar 3:50 vel khan typhoon Noul hian Guandong province-a tuipui kam, Huizhou khua a thleng tih a sawi. Thli tleh chak lam hi darkar khata km 145 vel a tling. Chhunah province laili lam a pan a, mahse thli chak zawng erawh a nep deuh tawh thung.

Thlipui tleh dawn vang hian Inrinni tlai lam khan mi nuai 3.4 chuang chu hmun him lama sawn chhuah an ni a, sorkar chuan province eng emaw zatah alert sang ber a tichhuak bawk.

Typhoon Noul hi kumina China ram thlipui tleh vawi 12 na leh, tun thla chhunga a vawi thumna a ni. Ruah a ken tel vangin Thawhlehni thleng chu ruah nasa taka a la sur chhunzawm rin a nih thu state media chuan a tarlang.