ICC prosecutor Karim Khan ban a ni

Russia president Vladimir Putin leh Israel prime minister Benjamin Netanyahu-te manna tura warrant diltu, International Criminal Court (ICC) prosecutor Karim Khan chu, hmeichhe laka mipat-hmeichhiat thila khawsak dik loh vanga thiam loh chantir a nih hnuah a hna aṭanga ban a ni.

ICC thuneitu sang, Assembly of States Parties chuan July 24 khan New York-a United Nations headquarters-ah ṭhutkhawm neiin Khan-a ban tur hian thutlukna an siam a ni. Karim chungchang an ngaihtuahnaah hian secret ballot hmanga vote lak a ni a, ICC member ram 125 zinga 82-te’n Rome Statute Article 46 hnuaiah ban tir an thlawp. ICC chuan thuchhuah siamin, “Assembly chuan Karim Khan-a hian thil lian tham a tisual a, a mawhphurhna a hlen lo tih a hmu chhuak a ni,” tiin an sawi.

Khan-a hian thil sual engmah a tih loh thu a sawi thung a, a ukil Tayab Ali pawhin he thutlukna hi dan hmangin kawng hrang hrangin a khing let dawn tih a sawi bawk.

Khan hi ICC-a thawk ukil junior pakhatin a duh lo chung mipat hmeichhiat thila khawsakpuiah a puh a ni. Khan-a erawh chuan he hmeichhia nen hian inzawmna engmah an neih loh thu a sawi thung.

Khan-a hi kum 2021 June thla khan kum kua chhung atan ICC prosecutor pathumna ni turin a hna hi a zawma, Ukraine-a beih a nih chungchanga Putin-a manna tura warrant a dil hnu khan khawvel hriat a hlawh chho hle. Hemi hnu hian Gaza Strip-a indona thlenga Palestinian mite chunga Israel chet danah Israel prime minister Netanyahu leh Defence Minister hlui Yoav Gallant-te manna tura warrant a dil leh a, ICC judge-te chuan he warrant hi an tichhuak zui a ni. Khan-a hian Hamas hruaitu liante leh Myanmar sipai hotu lu Min Aung Hlaing-a manna tur warrant-te pawh a lo dil tawh bawk.