France leh Spain-ah ram kang vangin mi 30,000 chuang tlanchhia

France leh Spain ramah ram a la kang chhunzawm zel a, ram kang vang hian mi 30,000 chu hmun him lamah an tlanchhe tawh. Khaw lum lutuk leh thli tleh tel bawk avangin kang ṭhelh hna hi an thawk chak thei lo a ni.

Spain ramah chuan ram kang vang hian state of emergency puan a ni tawh a, an ram khawpui Madrid bulah ram a la kang chhunzawm zel. Interior Minister Fernando Grande-Marlaska chuan khaw awm danin a zir loh avangin kangmei chhuak chu a ziaawm thei lo tih a sawi a, thli tleh avangin chhim lamah ram kang hi a chhuah chhunzawm a hlauhthawnawm thu a sawi. Spain ramah hian ram kang vangin Madrid leh Avila bialah mi 60,000 dawn chu sawn chhuah an ni tawh.

Madrid regional president Isabel Diaz Ayuso chuan kumian Spain-ah ram hectare 130,000 vela zau a kang tawh tih a sawi. Kum 10 liam ta chhungin kum khat chhunga ram kang zau zawng hi chawhrualin hectare 100,000 vel a ni ṭhin.

France ramah pawh kumin kumtir aṭanga ram kang thlengah ram hectare 98,000 a zau a kang tawh tih interior minister Laurent Nunez chuan a sawi. Kang ṭhelh hna thawhnaah sipaiten an pui a ni. President Emmanuel Macron chuan ram kang thleng mek leh, a ṭhelh hna chak zawka kalpui a nih theih dan tur ngaihtuahin emergency meeting a ko.

Italy-ah pawh hmun 350 velah ram a kang bawk a, mi tam tak sawn chhuah a ni. Scotland-ah Zirtawpni liam ta khan Cairngorms National Park-a ram kang vangin emergency puan a ni. He park-a ram kang hi a ni 10-na a ni tawh a ni.