US-in a zan 13-na atan Iran beih chhunzawm

US leh Iran-te inremna an siam hnua an inbeih thar leh hnuah, US chuan a zawna a zan 13-na atan Ningani zan khan Iran a beih chhunzawm leh a, nimin zing thleng khan missile hmangin hmun eng emaw zat a kap leh.

Iran hian US beihna chhan letna atan, US military base awmna a ṭhenawm ramte a bei let ve nghal bawk. Iran state media chuan Nilaini leh Ningani zan khan Strait of Hormuz-a Qeshm Island chu missile hmanga kah fuh a nih thu an tarlang.

Ram pahnihte an inbeih thar leh hnuah Iran chuan Strait of Hormuz pawh a khar leh nghal a, he tuikawng kaltlang tum lawngte pawh a bei leh fo a ni. US president Donald Trump chuan Ningani khan Strait-a tanker leh sumdawnna lawngte beih an nih leh chuan Iran in a man a pek dawn a ni tiin, US-in Iran thil neih a hrekte chu lawng a beihte siamṭhatna atan hman a ni ang, a ti.

Iran chuan US beihna chhan letna atan Jordan leh Kuwait-a US missile system, ralthuam dahna leh fuel dahṭhatna hmunte chu an kap let tih a sawi. Jordan sipaite chuan Iran missile pali leh drone paruk an lo kapthla a, pakhat erawh an lo dang fuh lo tih an sawi. Iran Revolutionary Guards chuan Kuwait-a US electronic warfare an kap fuh tih an sawi bawk. Iran sipai thupuangtu, Brigadier General Mohammad Akraminia chuan US-in Iran infrastructure te a beih chhung chuan an chhang let ve zel dawn tih a sawi.