Israel bank-ten Palestinian bank an thawhpuina tihtawp tum

Israel bank lian pahnih chuan Palestinian bank an thawhpuina an titawp dawn tih an sawi. Hei hi Palestinian bank-te chuan firfiakte suma an puih bakah, an sum lak luhna dik tawk lo awm theih hlauhthawnna avang niin an sawi.

Official-te chuan September 1 ah Israel Discount Bank chuan Palestinian bank-te a thawhpuina a titawp dawn a, October 1-ah Bank Hapoalim pawhin a titawp ve dawn tih an sawi. Heng bank pahnihte hian Palestinian lender eng emaw zat an thawhpui a, Palestinian ram chhunga bungrua lak luh, electricity, tui, fuel leh ei tur bakah Israel-a Palestinian mi hnathawkte hlawh lakna atan Israel bank nena inzawmna neih hi a pawimawh hle a ni. Bank pahnihah hian kum khat chhunga Palestinian-ten transaction an neih hi shekel tld 51 (USD tld 16.5) vel a tling pha ṭhin.

Palestinian Monetary Authority governor, Yahya Shunnar chuan Gaza war avanga Palestinian ram leh a mipuiten harsatna nasa tak a tawh hnuah, Israel bank-ten thawhpuina an titawp leh a nih chuan an dinhmun a chhe zual dawn hle tih a sawi.