Afghanistan-ah tuilian vangin mi 20 an thi

Afghanistan khawchhak lamah tuilian vangin mi 20 an thi a, hliam 80 awmin mi 100 chuang chin hriat lohin an awm tih thuneituten an sawi.

Tuilian hi Nuristan province-a thleng a ni a, harsatna tawkte ṭanpui leh chhan chhuah hna thawh nghal niin, chin hriat loha awmte pawh zawn mek an ni tih National Disaster Management Authority thupuangtu, Yousaf Hammad chuan a sawi. Tuilian hian chenna in, thlai chinna ram bakah public facility pawh a tichhe nasa hle tih a sawi bawk.

Afghanistan ram hian ruahsur nasa avanga tuilian a tuar fo a, mi eng emaw zatin an thih phah fo a ni.Kum 2024 khan tuilian vangin mi 300 chuang an thi a, kuminah ram chhung hmun hrang hrangah tuilian leh leimin vangin mi 110 an thi tawh a ni.

Tualchhung buaina thleng reng vang te, infrastructure chhia, economy dinhmun ṭha lo, ramngaw tihchereu leh sik leh sa inthlak danglam nasain a nghawngte avangin Afghanistan ramah hian khuarel chhiatna a thleng fo a ni. A bikin thingtlang lamten ruahsur leh vur tla nasate avangin chhiatna an tawk ngun hle. Khawchin zirtute chuan Afghanistan rama province 34 zinga 10-ah ruah leh thlipui a la thawk dawn tih an sawi.