UK Prime Minister thar Andrew Burnham

United Kingdom prime minister thar atan Thawhṭanni khan Manchester mayor hlui, Andrew Burnham chu a ruat a ni a, kum 10 chhung UK PM pasarihna a ni a, Keir Starmer a thlak a ni.

Britain lal, King Charles III chuan Thawhṭanni khan Labour party hruaitu thar, Burnham hi koin sorkar siam turin a ti a ni. He hunah hian Burnham hi a nupui, Dutch mi Marie-France van Heel leh amah thlawptu eng emaw zatin an ṭawiawm. Ṭawiawmtu zingah hian Burnham-a PM a nih theihna atana a seat, Markerfiel seat kiantu MP Josh Simons pawh a tel.

PM kal chhuak, Keir Starmer chu inthlanah Labour party a chakpui hnuin kum hnih chhung UK PM dinhmun hi a chelh hman a, Thawhṭanni khan PM a nihna aṭanga bangin, Labour PM nih tawh zingah ram hruaitu dinhmun chelh rei lo ber a ni. Starmer chuan a kaihhruaina hnuaia an ram tana hna an lo thawhnate zawng zawngte chu a chhuang hle tih sawiin, amah thlaktu Burnham chu duhsakna a hlan.

Prime Minister atana ruat a nih hnua 10 Downing Street-a thu a sawina hmasa berah, Burnham chuan politician-ten khawsak dinhmun tihsanna atana mamawh dinhmun nghet an thlen thei lo chu thlak a tum thu a sawi a, hma lak nghalna tur ruahmanna leh kumin tawp lama ruahmanna thui zawk an la duan chhuah turte hmangin a thlak dawn tih a sawi. An ram dinhmun siamṭha turin kalphung thar an mamawh tih a sawi a ni.

PM Starmer chuan a cabinet minister turte a ruat nghal bawk a, finance minister atan John Healey a ruat a, foreign minister-ah Ed Miliband leh interior minister-ah Shabana Mahmood a dah nawn leh bawk. Health minister atan Yvette Cooper ruatin, business minister-ah Jonathan Reynolds leh housing minister-ah Angela Ryaner te a ruat.