Iran-in sorkar dodaltu mi 2 khaihlum

Iran judiciary chuan kumin January thlaa sorkar dodalna hrang hrang lantirna kaihhnawiha thubuai siamsak, mi pahnihte chu thiam loh chantirin Pathianni khan khaihlum an ni tih a puang.

Mi pahnihte hi Erfan Esfandiari leh Gol-Mohammad Mohammadi te niin, police officer-te chu road sign-ah hruiin an phuar bet a, lunga vawmin khawnvartui an lei hnuah an hal zui bawk niin thuneitute chuan an tarlang. Police officer-te an bei leh tihhlum lai hi video-a lain, he video footage hi television channel-te hnenah an pe nia sawi a ni bawk. Man anih hnuh leh an thubuai ngaihtuah a nih lai an sawi lang lo a, an mi tihhlumte kum zat leh chanchin kimchang pawh an tarlang lo.

Nikum December thla tawp khan an ram pawisa hlutna tlahniam leh, thil man sang zel duh lohna lantirin Iran-ah hian nawrh huaihawt a ni a, January 8 leh 9-ah khan sorkar laka lungawi lohna lantirna nasa tak neih zui a ni. Nawrh huaihawt leh security force-te pawh an innawr buai hle a, buaina chhuakah mi 3,000 chuang an thi a ni. Sorkar chuan nawrh huaihawtte chu firfiaka cheah a puh a, he thil thlengah hian US leh Israel chu inrawlhah a puh tel bawk. Nawrhnaa tel mi tma tak chu man niin, thiam loh chantir pawh eng emaw zat an awm.