NY Mayor-in Israel PM man theih dan ngaihtuah

New York mayor Zohran Mamdani chuan New York-a UN summit neih huna Israel prime minister Benjamin Netanyahu man theih dan tur a la ngaihtuah zel tih a sawi. Ram dang hruaitu man tura New York Police Department thu pek turin thuneihna a neih leh neih loh a chian loh thu a sawi a; mahse legal team sawipui a tum tih Pathianni khan a tarlang.

UN General Assembly hi UN headquarters, New York-ah September thla hian neih a ni dawn a ni. He hunah hian Israel PM pawh hi a tel ngei rin a ni.

Zohran Mamdani hi Shia Muslim niin, a nu leh pa hi Indo-Ugandan leh Indian an ni a, Democratic Party member a ni. Kumin January thla khan New York mayhor atan lak luh a niin, New York-a Muslim leh Asian American mayor hmasa ber a ni. Israel chu chi leh chi inthliarna sorkar, apartheid regime tia sawiin, lo sawi tawhtu chuan, hei hi kum tam tak liam ta chhunga Netanyah thil tih tawh te rah chhuah niin a sawi. Netanyahu chu International Criminal Court-a thubuai nei lai a nih vangin, a chungthu ngaihtuah tura man ngei ṭul a tih thu a sawi. A hma pawhin ICC-in manna tur thupek a tihchhuah, Netanyahu bakah Russia president Vladimir Putin te chu NYPD man tir ngei a tum tih a lo sawi tawh bawk.

Mayor Mamdani thusawi chu Israel chuan a sawisel nghal a, UN-a Israel ambassador Danny Danon chuan mayor a nihna lama a mawhphurhna kengkawh a, khawpui chhunga Juda mi huatna thlengte tihtawp tuma hma la loin, amah ngei zawk chuan buaina tihpunlun a, Israel beihna thu sawi chhuah fo a thlang zawk a ni, a ti. PM Netanyahu chu New York-a kalin, UN General Assembly-ah Israel chungchanga thu dik tak leh, Israel-in a mite venghim tura dikna a neihte chu khawvel hmuhah a sawi dawn tih a sawi.