Venezuela lirnghinga thi mi 5,000 an chuang tawh

Venezuela rama June 24 zinga magnitude 7.2 leh 7.5-a lir nghingin chhiatna a thlena thi hriatchian chu mi 5,069 an ni tawh tih National Assembly hotu, Jorge Rodriguez chuan a sawi.

Jorge Rodriguez chuan chhiatna thlenga thi zat hi Telegram-ah tarlangin, a tam zawk chu tuipui kam biala mite an ni. Hliam tuar zat chu 16,740 niin, tam tak chu damdawi-in aṭangin chhuah an ni tawh tih a sawi bawk.

Interim president Delcy Rodriguez chuan an rama lirnghingin chhiatna rapthlak tak a thlen siamṭhat leh din thar lehna turin International Monetary Fund (IMF) aṭangin emergency fund, USD mtd 346 an hmuh thu a sawi. IMF managing director Kertalina Georgive pawhin fund pek chhuah a nih thu sawi bawkin, sum hi reserve aṭanga pek an ni, a ti.

Ṭum hnih na taka lir nghin hi an ram khawpui, Caracas hmarlama La Guaira state chuan a tuar nasa ber a; international airport, seaport leh apartment tower tam tak a chhai a ni. Tun thlengin mi 20,000 vel chu chenna in nei loin relief camp-ah an la khawsa mek a ni. Chhiatna thlen hnua chhan chhuah hna leh chhawmdawl hna thawh danah sorkar chu che chak tawk lohah puhin, an ram mipui sawisel pawh a hlawh hle.