Bangkok pub-a kangmei chhuakah mi 27 an thi

Thailand khawpui, Bangkok pub-ah Pathianni zan, zanlai vel khan kangmei a chhuak a, mi 27 an thih bakah hliam tuar 60 chuang an awm. Hliam zinga mi 22 chu an dinhmun a ṭha lo nia sawi a ni.

Kangmei chhuahna hi Bangkok hmarlam, kawng pengṭhum bula hmun lun laia awm, Rong Beer Na Lat Phrao pub niin a bul hnaiah cinema, park leh Chatuchak weekend market-te a awm. Helai bialah hian bar pawh eng emaw zatin, kartawpah live music nen hun an hmang ṭhin a, hei vang hian a lun thei hle. Kangmei chhuak hi kangṭhelhtu eng emaw zatin ṭhelhin, minute 30 hnu velah an ṭhelh mit thei a ni.

Bangkok governor, Chadchart Sittipunt chuan kangmei hi a darh chak hle tih sawiin, official-ten an chhuina hmasaah tlan chhuahna tur, fire exit chu tlan chhuah theih lohna dan a nih avangin thi an tam phah niin an sawi.

Prime minister Anutin Charnvikarul chuan nimin khan chhiatna thlenna hmun hi a tlawh nghal a, kangmei chhuah chhan tak hriat chian a la nih loh thu leh, uluk taka chhui mek a nih thu a sawi a ni.