Spain-ah ram kangah mi 11 an thi

Spain ram chhim lam, Almeria biala ram kang nasa tak thleng vangin mi 11 an thi a, chin hriat lohin mi 19 an awm. Ram kang ṭhelh hna hi theihtawpa thawh chhunzawm zel a ni.

Thuneitute chuan ram kang vanga thi leh chin hriat loha awm tam zawk hi ram dang mi an ni tih sawiin, sorkarin fimkhur tura thuchhuah a siam, pawn chhuak lo tura a hriattirna zawm lote an ni tih a tarlang.

Antas khaw mayor, Pedro Ridao chuan kangmei hi power cable chat, a hnuaia hnima a tlak hnua rawn chhuak niin a sawi. Thli a tleh tel bawk avangin kangmei hi a darh chak hle tih a sawi bawk.

Prime minister Pedro Sanchez chuan ram kangin chhiatna nasa tak a thlen chu pawi a tih thu leh, nunna chan chhungte a tawrhpui thu a sawi.

Kumina Europe ram hrang hrangah khawlum zual, heatwave a thlen avangin a bikin Europe chhim lam bialah kang pawh a thleng fo a ni. France leh Portugal-ah pawh ram kang vangin mi tam tak chuan an chenna in an tlanchhiatsan a ni. Spain-ah hian June thla khan kum 1950 hnua June thla lum ber ṭum a thleng. Nipui khawlum zual lai hian kum dangah ram kang hi a thleng fo a, nikum khan Spain bikah hian ram hectare 393,000 vela zau a kang niin European Forest Fire Information System (EFFIS) chuan a tarlang.