China-ah pheikhawk siamna factory a kang

China ram khawchhak lamah Ningani khan pheikhawm siamna factory-ah kangmei nasa tak a chhuak a, mi 28 an thi. Kang ṭhelh hna hi kang-ṭhelhtu 500 chuangin an thawk a ni.

Kangmei chhuahna hmun hi Jinjiang khawpuia Huiteng Shoes factory niin, an ram huna Ningani chawhnu dar 2 vel chhuak a ni. A kan lai hian buildingah thawktu mi 237 vel an awm. Kangmei chhuah chhan hi hriat ala ni lo a, chhui chian mek a ni. Company neitu leh mi dang ṭhenkhat chu hren an ni a, company account pawh khawih chet theih loha hreksak nghal a ni bawk.

Jinjiang khawpui hi China rama pheikhawk siamna hmunpui niin, khawvel huap pawha infiammite bun chi pheikhawk siamna centre pawimawhte a awm a ni.

President Xi Jinping chuan chhiatna thlengah mi tam takin nunna an chan chu pawi a tih thu sawiin, he thil thlenga mawhphurtu chu hrem a nih ngei tur thu a sawi. An ramah kumin chhungin industry-a chhiatna liantham thleng a awm fo a, hei vang hian bial tin leh a kaihhnawih department-te chuan himna ngai pawimawhin, heng chhiatna thleng aṭangte hian a inzir a ngai a ni, a ti.