SKorea Supreme Court-in President hlui Yoon-a hremna pek nemnghet

South Korea Supreme Court chuan an ram president hlui, Yoon Suk Yeol-a'n kum 2024-a martial law a puan avanga thubuai siamsakah Seoul High Court-in kum sarih tang tura a hremna chu pawmpuiin, nimin khan President hlui hremna pek hi a nemnghet.

Seoul High Court chuan April thla khan Yoon hi kum 2024, December 3-a sipai thuneihna sang pekna, martial law a puan chungchangah thiam loh chantirin hremna hi a lo tichhuak tawh a ni. Court chuan Yoon hian martial law a puan hnu lawk hian National Assembly chu sipai leh police-te a ventir nghal a, mahse hetichung hian Parliament member-te chu lut luiin, vote hmangin President thupek hi an hnawl a, hemi hnu hian Yoon chuan martial law a puan chu a sut leh nghal a ni. A hnuah President a nihna aṭangin paihthlak a ni zui bawk.

Yoon hi jail-ah a tang mek a, nimina court-ina a hremna a nemnghehnaah hian a inlan lo. Thubuai dang pawh siamsak a ni a, an rama helna chawk chhuah tuma puhnaah dam chhung tang tura hrem a lo ni tawh bawk a ni.