China-ah tuilian vangin mi 20 an thi

China ramah ruahsur nasain chhiatna a thlen leh tuilian thlengah mi 20 an thi a, hliam 331 an awm. Tuilian hian rul vulhna hmun a tihchhiat avangin rul 900 vel a chhuak niin thuneitute chuan an sawi. Hei hian mipuiah hlauhthawnna pawh a thlen nasa hle.

Thawhṭanni aṭanga nasa taka ruahsur vang hian an rama lui 62-te chuan hlauhawm chhinchhiahna an pel tawh tih thuneitute chuan an sawi. Guangxi province-a Qingshui lui chu hriat theih china a len nasat ber ṭum a thleng. Ruah a la sur chhunzawm avangin lui hrang hrangte hi an la len chhunzawm zel rin a ni bawk.

Khawchhak lama Hubei province-ah tuilian vang hian mi 11 an thi a, chin hriat lohin mi pakhat a awm bawk. Mi 400 vel chu hun him lamah sawn chhuah an ni. Ruahsur nasa leh thlipui thawkin building 22 chu luah zui tlak lohin a tichhia a, in dang 4,855 pawh a chhe tel bawk. Chhim lama Guangxi Zhuang Autonomous Region-ah pawh ruahsur nasa leh tuilian vang hian mi pali an thi a, chin hriat lohin mi pariat an awm. An bial huam chhungah mi 93,300 velin harsatna an tawk a, hmun him lamah mi 54,460 chu sawn chhuah an ni tih official-ten an sawi. Hmarthlang lama Gansu province-a Tanchang County-ah ruahsur avanga leimin thlengah mi panga an thi a, mi 12 chin hriat lohin an awm bawk a ni.