Germany-a inpawngkahna thlengah mi 6 thi

Germany ram hmarlam, Stade khuaa youth welfare facility-ah Thawhṭanni khan inpawngkahna a thleng a, mi paruk an thi. Silai hmetpuaktu mipa leh a thurualpui nia sawi hmeichhe pakhat man nghal an ni bawk.

Police-te chuan pawikhawihna thlennaah hian mi panga, hmeichhia pali leh mipa pakhat an thi a, a hnuah mipa pakhat chu damdawi-inah hruai a nih hnuin a thi ve leh tih an sawi. Thite hi he centre leh a hnuaia thawkte vek an ni.

Lower Saxony region interior minister, Daniela Behrens chuan pawikhawihna thlen chhan hi chhui chian mek a nih thu leh, he thil thleng hi a dem takzet tih a sawi. Police-te chuan hliam tuar eng emaw zat an awm bawk niin an tarlang. Pawikhawihna thlenna centre-ah hian nu naupai leh nausen pawm laite awm lailawkna tur pawh siam tel a ni tih an sawi bawk.

Germany ram hi Europe-a gun laws a khauhna ber zingah a tel a, inpawngkahna ang chi hi a thleng khat hle. Silai license nei turin kum 25 hnuai lam chuan psychiatric exam pawh an paltlang a ngai a ni. Thawhṭannia pawikhawihna thlenna, Stade khuaah hian mi 50,000 vel an cheng a, Hamburg aṭanga km 40 vela hlaa awm a ni a, inkahna thleng hi tun hnai kum eng emaw zat chhunga an rama inpawngkahna thleng rapthlak ber zingah a tel.