Venezuela-a lir nghing vangin building 58,000 chuang a chhia

Venezuela rama kar liam taa ṭum hnih lirnghing na tak thleng vang khan building 58,000 chuang a chhia tih US space agency, NASA satellite data zirchianna aṭangin a lang. Lirnghing vanga thi zat hi 1,700 an tling tawh bawk a, hliam tuar mi 5,000 vel an awm bakah mi sing tel chu chin hriat lohin an awm mek bawk.

Lir a nghin tuk, June 25-a satellite radar data lakkhawm an zirchianna aṭangin lir nghinna biala building 58,870 chu chhia leh tlusawp a awm tih Oregon State University-a researcher, Corey Scher leh Jamon Van Den Hoek ten an sawi.

Venezuela National Assembly president, Jorge Rodriguez chuan lirnghing vanga in chhia hi 855 niin, heng zinga 189 chu a tlusawp vek tih Thawhṭanni khan a sawi thung.

Kar liam ta Nilaini zana magnitude 7.2 leh 7.5-a lir a nghin hnuah, aftershock vawi 500 chuang a thleng leh tawh a, heng zingah hian magnitude 5.2-a na te pawh a tel a ni. Harsatna tawkte chhan chhuah leh chhawmdawl hna hi emergency worker, police leh sipai 25,000 chuangin an thawh chhunzawm mek a ni.

European Union chuan harsatna tawkte chhawmdawlna tur Euro mtd 5 a pe a, hei hi lirnghing vanga in leh lo changte awmna tur ngaihtuahsakna atan leh, healthcare atan hman a ni ang. EU hian lirnghinna biala an mamawhte thawn luh fdan tur pawh a ngaihtuah mek a, tunkar hian Copenhagen aṭangin mamawh hrang hrang ton 50 vel thawn luh a tum. Kar liam ta kartawp khan Spain, Austria, Italy, Luxembourg, Belgium, Estonia bakah European Commission hnuaia emergency response coordination centre (ERCC)-a technical expert team 11-te chuan Venezuela hi an thleng tawh bawk.