DR Congo-ah Ebola vei 1,307 leh thihpui 337 awm tawh

Democratic Republic of the Congo (DRC) sorkarin data a tihchhuah tharah, an ramah Ebola vei hmuh chhuah tawh chu mi 1,307 an tling tawh a, hri vei zinga 337 in an thihpui tawh bawk.

Thawhṭanni zana data tihchhuahah hian Ebola hri kai hmuh chhuahna chu province pathum - Ituri, North Kivu leh South Kivu te an ni tih an tarlang. Hetih lai hian National Institute of Biomedical Research (INRB) chuan he hri kai hi South Sudan leh Central African Republic ramri bula awm, Haut-Uele province-ah a darh tel tawh bawk niin an sawi a, Ituri province khawpui Bunia-a zin pakhat chuan hri hi an kai a, a hnuah a thihpui niin an tarlang. Haut-Uele a thi hi Ebola hri kai ngei a ni tih finfiah a nih chuan, DR Congo hmarchhak bial pum, mi mtd 15 vel chenna bialah he hri hi a darh tawh tihna a ni dawn a ni.

Kar liam ta Inrinni khan sorkar chuan hmarchhak biala provinve pali bakah an ram khawpui, Kinshasa-ah hri leng zel tur venna tan vantlang punkhawm khapna thupek a tichhuak. Kinshasa-ah hian hri kai hmuh chhuah la awm lo mah se, Juy 8-ah an ram danpui siamṭhat phuta eptuten nawrh huaihawt lian tham tak buatsaih an tum vangin khapna hi siam tel nia ngaih a ni. Hei vang hian eptu lam chuan khapna siam hi sawiselin, politics kaihhnawih thil zawk niin an puh.

DR Congo ṭhenawm, Uganda-ah pawh Ebola hri kai hi 20 hmuh chhuah tawh niin, mi pahnihin an thihpui tawh bawk a ni. Kumin May 15 khan World Health Organisation (WHO) chuan Ebola hri leng chu Public Health Emergency of International Concern (PHEIC) ah a lo puang tawh bawk.

Ebola hri leng mek hi Bundibugyo strain niin, a hri kaite body fluid, thisen leh luak aṭanga kai chhawn theih a ni a, a vaccine leh damdawi hi a la awm lo bawk a ni. Mahse, Thawhṭanni khan Africa Centres for Disease Control and Prevention (Africa CDC) hotute chuan tunkar chhungin antivirual drugs thar chu enchhin hna kalpui ṭan a ni dawn tih an sawi.