Strait of Hormuz-ah lawng beih a nih vangin Tangkhangte hruai chhuah hna chawlh phah
United Nations hnuaia International Maritime Organization (IMO) chuan Hormuz-a lawng leh lawnga thawktu tangkhangte hruai chhuah hna a thawh chu Strait-a lawng a beih a nih leh avangin a chawl leh rih.
US leh Iran-in inremna an siam hnuah, West Asia buaina thleng vanga Strait of Hormuz-a hun rei tak tangkhang tawhte hruai chhuah hna kalpui a tum thu IMO hian Thawhlehni khan a lo sawi tawh a ni. An ram beih a nih hnua Iran-in Strait a khar vang hian lawnga thawktu 11,000 vel an tangkhang mek a ni. IMO hotu Arsenio Domiguez chuan lawng eng emaw zat chu hruai chhuah an ni tawh tih a sawi a; mahse, Ningani khan Oman port, Dahit aṭanga tuipui mel 7.5 vela hlaa lawng awm chu projectile hmanga kah fuh a ni tih British maritime security agency, UKMTO chuan a sawi. Lawng beihnaah hian thawktu zingah thi leh hliam an awm lo nia sawi a ni.
Strait of Hormuz-a lawng kaptu hi sawi chian a ni lo a, US official-te chuan Iran kah niin an sawi. Hemi hma hian Iran Islamic Revolutionary Guard Corps (IRGC) chuan IMO in lawng hruai chhuahna tur kawng, route a ruahman chu an pawm lo a, he kawng hi lawng tan a hlauhawm dawn tih sawiin, Iran duh dan anga kal zawk turin an lo ti tawh a ni. He thu an sawi hnuah lawng hi beih a nih leh tak avangin Iran tih niin an ngai a; mahse, Iran chuan hemi chungchangah hian sawi a la nei lo thung. Lawng an kah fuh hi Singapore flag inzarna, Ever Lovely tih a ni a, kah a nih hnuah pawh strait-ah hian a kaltlang zel tho a, lawng dang paliin an zui niin an tarlang. Lawng hi beih a nih hma hian Iran Navy lam aṭangin warning engmah pek a ni lo tih an sawi bawk.
IMO hotu Domiguez chuan lawng tangkhang mekte chu him taka hruai chhuah an nih theihna tur agency chuan a ngaihtuah dawn a, hemi hnuah hruai chhuah hna chu chhunzawm leh a ni ang tih a sawi. Ningania lawng beih tawk pawh kalkawng tur an ruahman ni loa kal a ni tih a tarlang. Tangkhangte hruai chhuah hna kalpuinaah hian Oman, US, Iran leh tuipui kama ram dangte bakah maritime industry te pawhin an thlawp ṭha niin a sawi.