Venezuela rama lirnghing vanga thi zat 235 tling tawh

Venezuela rama Nilaini zana ṭum hnih lirnghing na tak thleng vanga thi zat chu nimin khan mi 254 an tling tawh a, hliam tuar mi 4,300 chuang an awm bakah, chin hriat lohin mi sang tel an awm bawk.

Lirnghin vang hian an ram khawpui, Caracas leh La Guaira state-ah in tam tak a chim a, in chim hnuaia tangte chhan chhuah hna chu ngawrh taka thawh chhunzawm a ni. Lirnghing tuarte chhan chhuah hna leh ṭanpui hna thawhna kawnga pui turin ram eng emaw zatin rescue team bakah chhawmdawlna thilte an thawn tawh. US, Brazil, Canada, Mexico, Colombia, El Salvador, Cuba bakah UN chuan chhan chhuah hna thawktute an tir tawh a ni.

Interior minister Diosdado Cabello chuan Nilaini zana magnitude 7.2 leh 7.5-a naa lir nghing vangin an ram khawpui, Caracas hmar lama La Guaira state-ah chenna in 100 chuang a chim a, mi 70,000 vel a nghawng tih a sawi. He bial hi Venezuala international airport pui ber awmna a ni a; lirnghing hian a tihchhiat tel avangin airport pawh hi an khar phah bawk.

International Federation of Red Cross leh Red Crescent Societies (IFRC) chuan chhan chhuah hna thawhnaa puihna tur USD mtd 2.5 an pe chhuak a, Pope Leo XIV pawhin emergency aid USD 114,000 hu a thawn bawk tih Vatican chuan a sawi.