Israel leh Lebanon aiawhten inbiakna nei thar leh

Israel leh Lebanon aiawhte chuan nimin khan Washington, US-ah inbiakna an nei thar leh a, June 25 thleng inbiakna hi neih chhunzawm a ni ang.

Lebanon official-te chuan kumin March 2 aṭanga Lebanon-a Israel leh Hezbollah te inbeihna tihtawpna tur chuan Israel aiawhte nen hmaichhana inbiakna an neih a ngai tih an sawi. Hezbollah ten Iran thlawpna lantira Israel an beih avanga Israel-in Lebanon ram hmun hrang hranga beihpui a thlaknaah mi 4,000 chuang an thi tawh a, an zingah hian civil mi tam tak an tel tih Lebanon sorkar chuan a sawi.

April thla aṭang khan Israel leh Lebanon aiawhte chuan inbiakna ṭum li an nei tawh a; mahse, inremna mumal an la siam thei lo. Lebanon aiawhte chuan inremna siamna turah hian an ram aṭanga Israel sipaite hnuhdawh chu an thil phut pui ber zingah a tel dawn tih an sawi a, hetih lai hian Israel lam chuan Lebanon chhim lamah an sipaite chu an awm zui zel dawn tih an sawi thung.