Afghanistan-a Taliban hruaitute hmeichhiate khuahkhirhna siam thlak turin ngen

UN Security Council chuan Afghanistan-a rorellai, Taliban hruaitute chu hmeichhiate laka hmalakna khauh tak leh khuahkhirhna an siam te chu thlak tura ngenin resolution an pass.

He resolution thlawptu ram, China-in UN-a ambassador a tirh Fu Cong-a chuan, Afghanistan sorkar chuan mihring dikna chanvo, a bik takin hmeichhiate dikna humhalh kawngah hmalakna tak tak an neih ngei a beisei thu a sawi. Taliban sorkar chu inhawng tak, mi zawng zawng huapzo, leh mawhphurhna hria an nihna lantir turin a beisei thu a sawi bawk.

Resolution-ah hian Afghanistan-a UN political mission chu June 17, 2027 thleng pawhsei a ni bawk. Hemi rual hian inthliar hranna awm loa ṭanpuina sem chhuah a nih thieh nan leh,hmeichhia, hnam tlêm zâwk, ṭhalai, leh mi piansualna nei tute intluktlang taka an tel ve theihna tur, sakhua leh hnam vanga thliarna awm loa tualchhung irelbawlna kalpui tura an phut thu an tarlang bawk a ni.

Tun thla tir lamah Herat khawpuia hmeichhia 30, Taliban-in dress code khauh tak an siam bawhchhiaa puha man an nih hnuah UNSC chuan resolution hi a siam a ni. Hmeichhiate man an nih avang hian lungawi lohna pawh lantir a ni a, Taliban police-te chuan nawrh huaihawt zinga pakhat chu kap hlumin, mi dang eng emaw zatin hliam an tuar bawk tih UN mission, UNAMA chuan a tarlang.

Taliban-ten kum 2021-a Afghanistan-a thuneihna an chan hnuah, Islamic law, Shariah chu khauh taka kengkawhin, hmeichhiate lakah khuahkhirhna hrang hrang an siam zui a ni. Hmeichhiaite chu zirna lamah primary school chin bak an kal an phalsak loa, pawn lama hnathawh pawh an khap bawk.