Vietnam-ah khawvela stadium lian ber sak tum

Vietnam-a Vingroup chuan an ram khawpui, Hanoi-ah khawvela stadium lian ber sak a tum a, thawktu sang telin stadium sak hna hi an thawk mek. Nakkum July thlaah zawh hman tum a ni.

Stadium an sakna hi Hanoi khawpui chhim, central Hanoi aṭanga km 25 vela hlaah a ni. Vietnam hnam khuang hming chawiin a hmingah Trong Dong Stadium tih vuah a ni a, a design pawh an khuang behchhan hian siam a ni bawk. Vingroup in khawvel huapa event lian tham thlen theihna tura USD tld 35 senga Olympic Sports City siama tumna hnuaiah stadium pawh hi telh a ni. Sports City hi ram hectare 9,000 chuanga zauah siam an tum.

Vingroup chuan stadium sakna tur bik atana sum ruahman hi a tarlang lo a, mahse,he facility hi hun rei tak daih tur, sports leh cultural event lian tham bakah concert-na atana hman theih tura duan a ni tih an sawi. Seat 135,000 a awm thei dawn a, khawvela stdium lian ber nia sawi mek, North Korea khawpui, Pyongyang-a Rungrado Stadium, seat 120,000 vel awmna chu a khum thei dawn a ni. Trong Dong Stadium chung hi hlih theih tura duan a ni a, grass tray system hman a ni bawk ang. 5G connectivity leh AI crowd monitoring pawh a awm dawn a ni. A tirah chuan kum 2028 August thlaa zawh tura ruahman a ni a, mahse nakkum July thlaah peihfel hman tum a nih thu an sawi leh a ni.