2019-a Easter Sunday-a bomb puak Sri Lanka intelligence hotu thupek niin puh

Sri Lanka public security minister chuan Nilaini khan parliament-ah kum 2019-a Easter Sunday-a an rama Kristian biak in leh hotel beihna rapthlak thleng kha an ram intelligence hotu hlui Major General Suresh Sallay kaihhruaina leh thununna hnuaia thleng a nih thu a sawi. Mi 279 in an thih phahna, bomb tihpuahnaah hian intelligence hotu hi a inhnamhnawih ngei a ni tih sorkarin official-a a sawi chhuah vawi khatna a ni.

Major General Sallay hi Easter Sunday-a Catholic biak-in bomb tur hi a thlang nia sawi a ni a, pawikhawihna thlentute pui leh thlawpna pea puhin February thla khan man a lo ni tawh bawk.

Kum 2019 Easter Sunday-a pawikhawihna thleng hi Sri Lanka-a mipui chunga firfiaka beihna thleng tawh zinga rapthlak ber nia sawi a ni a, khawpui lailia hotel changkang pathum, Roman Catholic biak in pahnih leh Colombo pawn lama evangelical Protestant biak in pakhat chu bomb hmanga beih an ni.

Wijepala chuan, "Chhui chianna aṭangin Major General Sallay hian Islamic firfiakte a lo pui a, ruahmanna felfei tak nen a lo kaihruai a ni," a ti. Biak-in beih a nih kar thum velah khan an beih tur hmun leh inkhawm tur mipuite chanchin kimchang lakhawm tur mite pawh a tir niin a sawi. Hetih lai hian Shallay chuan a lawyer kaltlangin an puhna hi a pha thung.

Sallay chu Prevention of Terrorism Act hnuaiah hren a ni a; mahse, chaw ngheia lungawi lohna a lantir avangin Pathianni khan damdawi inah admit a ni. A thlawptute chuan Shallay hi chhuah tura phutin Colombo-ah lungawi lohna an lantir mek bawk.