Indonesia-in Myanmar-a muanna tluantling a awm duh

Indonesia foreign minister Sugiono chuan Myanmar khawpui, Naypyidaw a tlawhnaah Myanmar-ah remna leh muanna tluantling a awm theih nan Indonesia chuan theihtawp a chhuah zel dawn tih a sawi. Thawhlehnia sorkar thuchhuah tarlan danin Sugiono hian Myanmar president Min Aung Hlaing a hmu a ni.

Sugiono hian Indonesia president Prabowo Subianto thuchah chu Myanmar hrauitu hnenah a hlan a, he thuchahah hian Myanmar-a tualchhung buaina chinfelna tur leh remna leh muanna din a nihna turin Indonesia sorkar chuan a thlawp zel dawn tih a tarlang. Sugiono chuan buaina chu chinfel a nih theih nan Indonesia chu Myanmar-a thuneitu leh he buaina nena inhnamhnawih zawng zawngte nena thawk ho turin a inpeih reng tih a sawi.

Remna leh muanna a awm theihna turin Myanmar chuan hma hruaiin ṭan a lak a ngai tih a sawi a, an ram buaina chinfel a nih theihna tura ASEAN-in "Five-Point Consensus" an siam chu hman a ṭul thu pawh a sawi bawk. Sugiono-a'n Myanmar a tlawh hi inbiakna leh inremsiamna a awm theihna atana ASEAN hmalakna peng pakhat a ni a; Philippines, Thailand, leh Malaysia Foreign Minister-te pawhin thla eng emaw zat hetiang thil vang hian Myanmar hi an lo tlawh tawh bawk a ni.

Sugiono hian Myanmar foreign minister Tin Maung Swe nen ram pahnih inkar leh he bial huap thil pawimawhte an sawi dun bawk.