US-in Cuba President hrekna a siam

US chuan Ningani khan Cuba president Miguel Diaz-Canel bakah mi dang pali leh pawl panga hrekna a siam. Hrek zingah hian Ministry of the Revolutionary Armed Forces of Cuba pawh a tel.

Kum 60 mi, Diaz-Canel hian kum 2018 a Raul Castro hnen aṭanga thuneihna a lak hnuah Cuba president hi a la ni chhunzawm zel a ni. Thuneihna a chan hnuah an ram economy dinhmun a tlachhe hle a, energy lamah harsatna an tawk bawk. US-in oil lama hrekna a siam avangin tun hnaiah an harsatna hi a nasa zual hle.

US president Donald Trump chuan hrekna siama nih chungchangah US chuan Cuba ram chu mi ṭha tak rorelna hnuaia a awm a duh a ni, a ti. Cuba ram chu a tluchhe ṭep tawh niin a sawi a, Iran-a beihpui an zawh fel hunah Cuba lam chu an buaipui dawn tih a sawi bawk. Thla hmasa khan US sorkar chuan Cuba official 11 te hrekna a lo siam tawh bawk a, hrek zingah hian communication minister bakah sipai hotu ṭhenkhat leh intelligence agency pawh an tel.

Diaz-Canel chuan US thutlukna siam thar chu an ram a vauna thar a ni tiin, Cuba leh US inkar buaina tihpulun tumna niin a puh. An thil tih chu Cuba ram leh a ram mipuite tihnat tumna a ni, a ti.