UN-in El Nino thawk na tak hmachhawn tura inbuatsaih turin chah

United Nations weather agency, World Meteorological Organisation chuan khawvelah El Nino thawk na tak thleng thei a nih thu sawiin, hemi atan inbuatsaih turin ram hrang hrangte a chah. Khawlum nasa tak a thlen theih bakah, thla lo awm turah khawchin ṭha lo tak pawh a thlen theih thu a hrilh.

El Nino hi Pacific Ocean laili leh khawchhak lam tuipui chunglang lum chhoh vanga thleng ṭhin a ni a, a tlangpuiin thla 9 aṭanga thla 12 inkar a awh ṭhin.

WMO chuan El Nino vanga khawlum zual hi khawvel hmun hrang hrangah June thla aṭanga August thlaa thleng thei a nih thu sawiin, November thleng pawhin a awh maithei niin a sawi. WMO secretary general Celeste Saulo chuan, "El Nino chak tak lo thleng tur atan kan inbuatsaih a pawimawh a ni. Hei hian khawkheng leh ruah nasa tak a thlen theih bakah, khawmual leh tuipuiah heatwave a thlen theihna pawh a sang hle," a ti.

El Nino hian khawvel hmun hrang hranga khawchin a tibuai thei hle a, boruak lumna a tihsan bakah South America leh US chhim lam te, Horn of Africa hmun ṭhenkhat leh Central Asia-ah ruah a ti tam ṭhin a, hemi rual hian Australia, Central America leh Central Asia chhim lama hmun ṭhenkhatah khawkheng a thlen thei bawk. Pacific Ocean leh khawchhak lamah thlipui a siam thei bawk tih WMO chuan a sawi. Kum 2023 leh 2024 inkara El Nino thleng vang khan kum 2024 chu chhinchhiah tawha khawvel lum ber kum a nih phah niin Saulo chuan a sawi bawk.

Saulo chuan khawlum lutuk pawh mi tam takin an thihpui a, El Nino thleng hian a hlauhawmna a tizual thei tih a sawi. Hlauhawm thleng thei zingah khawlum vanga natna te, natna hrik kengtu rannung kaltlanga natna hri darh zual te, ei leh in leh tui lama harsatnate a tel a ni.