Energy lam harsatna vangin Pakistan-in bazar khar hun siam

Pakistan thuneitute chuan West Asia buaina avanga energy lama harsatna an tawh mek avangin Thawhṭanni aṭang khan Islamabad-a sumdawnna hmun hrang hrang khar hun tur a bithliah thar leh a, zan dar 8-a khar vek turin a ti. He hmalakna hi sorkarin inrenchemna a ruahman zinga pakhat a ni.

Deputy Commissioner Iran Memon chuan social media-ah kaihhruaina thar siam hi tarlanin, tun kar chhung atan kalpui a ni phawt dawn tih a sawi. Hetih lai hian ei tur leh chaw lam chi dawrte erawh zan dar 10 thleng hawn phalsak an ni thung.

Thuchhuah an siamah inneihna hall, leh event neihna hmun dangte chu zan dar 10 thleng hawn phalsak an ni tih an tarlang. Damdawi dawr, hospital, petrol pump, sports facility, call centre leh IT company-te chu khuahkhirhna siam hian a huam dawn lo a ni.

Pakistan sorkar chuan February thla tawp lama US leh Israel-in Iran an beih avanga West Asia buaina a thlen hnuah oil leh energy lama harsatna a awm zui avangin March thla tir aṭangin inrenchemna a kalpui a ni. Sorkar hna thawkte pawh in lam aṭanga an hna thawh phalsak an ni a, school leh college-te pawhin online class an kalpui bawk. Energy lama harsatna an tawh vangin March 23-a Republic Day parade neih tur pawh an lo ṭhulh phah tawh bawk. Sorkarin khuahkhirhna thar a siam leh hi sumdawng lam chuan an sawisel thung. Dan tlangpuiin sumdawnna hmunte hi chhunlai aṭang zan rei thleng hawn a ni ṭhin a, zan lama inkhar hma tura tih hian sumdawngte an pawh harsatna a siam phah nasa ṭhin a,an eizawnna in a tuar phah ṭhin hle tih an sawi.