Thailand court-in lal chhungkua sawiseltu politician thiam chantir

Thailand criminal court chuan kum 2021-a Facebook livestream-naa an ram lal chhungkua sawisel vanga thubuai siamsak, eptu politician Thanathorn Juangroongruangkit chu nimin khan thiam a chantir.

Kum 47 mi, Thanathorn Juangroongruangkit hian eptu pawl, People's Party thlawptu, progressive political movement dintu a ni. Kum 2021 Januar thlaa a livestream-naah an ram sorkar chu Covid-19 vaccine campaign a kalpui danah a ti dik lo tih sawiin, an ram lal King Maha Vajiralongkorn-a company, Siam Bioscience chu dik tawk lo taka duhsakna lantirah a puh a ni. A thusawi avang hian cyber dan bawhchhia leh, an ram lal chhungkua sawisela puhin thubuai siamsak a ni.

Thailand ram hian an lal chhungkua sawisel leh sawichhiat khapna dan khauh tak an nei a, he dan hnuaia thiam loh chantirte chu kum 15 thleng lung in tantir theih an ni. Cyber law bawhchhiate chu kum nga lung-in tantir theih an ni bawk.