China leh Pakistan-in thawh dunna nghet siam zel remti

Pakistan leh China chuan thuchhuah inṭawm siamin, thawh dunna an lo siam tawhte vawnnun zel bakah, hun lo kal leh turah pawh thawh dunna nghet zawk siam zel an remtih thu an tarlang.

China premier Li Qiang-a'n a sawm angin Pakistan prime minister Shehbaz Sharif chu May 23-26 khan China-ah a zin a,a cham chhung hian field hrang hranga ram pahnihte thawh dunna tur thuthlungte an ziak a ni. Shehbaz hian premier Li bakah China president Xi Jinping pawh a kawm a, ram pahnihten inlaichinna an siam champha vawi 75 puala hun hmanah pawh telin Zhejiang province-a Hangzhou khawpui a tlawh bawk.

Ram pahnih hruaitute hian South Asia-a boruak muanawm a awm theihna atana theihtawp chhuah zel an duh thu te, buaina leh inhriatthiam lohna awm ṭhinte pawh inbiakna hmanga chinfel an duh thute an sawi. Pakistan leh China hian kum 75 chhung inlaichinna hi lo nei tawhin, an inṭhianṭhatna pawh hi a nghet hle a, international leh regional thilah pawh inring tawn leh inzah tawn takin an inthlawp zel tih an thuchhuahah an tarlang a ni.