Nepal SC-in PM hlui Deuba leh a nupui manna tur dansak

Nepal Supreme Court chuan an ram prime minsiter hlui, Sher Bahadur Deuba leh a nupui Arzu Rana Deuba-te dik lo taka sum la lut nia puh chungchangah Kathmandu District Court-in manna tur thupek a tihchhuah chu a dansak.

Justice Mahesh Sharma Paudel leh Nityananda Pandey awmna bench chuan nimin khan Deuba te nupain Kathmandu District Court-in arrest warrant a tihchhuah chungchanga petition an theh luh chu ngaihtuahin, PM hlui te nupa man khapna interim order a tichhuak a ni.

Nikuma Nepal rama Gen Z kaihhruaia nawrh huaihawt a nih ṭum khan, Deuba chenna in hi an bei tel a, an nupain hliam pawh an tuar a ni. A in an beihnaah hian nawrh huaihawtte chuan a in chhunga an hmuh, Nepal pawisa bakah US dollar eng emaw zat an hal a, a video clip pawh social media lamah thehdarh a ni. Pawisa hal a nih chungchang hi Money Laundering Department chuan an chhui a, paper note an hal vap te chu an enfiah bawk.

Supreme Court chuan Deuba te nupa laka arrest warrant tihchhuah chu dan ang taka kalpui a ni lo tih sawiin, thuneitute hnenah man lo turin a hriattir a ni. Nepal police-te hian Interpol hnenah pawh Deuba leh a nupui laka red corner notice tichhuak turin an lo ngen tawh a, mahse, Interpol chuan hnawlin police-ten document an pekte chu notice tihchhuah chhanah a tlak lo niin a sawi.