LNG phurtu lawng 2-in Hormuz Strait kal tlang

Liquefied Natural Gas (LNG) tanker pahnihin nimin khan Strait of Hormuz an kal tlang a, Pakistan leh China lam an pan mek. Inrinni liam ta khan thla thum dawn tangkhang tawh, Iraq crude oil phurtu supertanker pawhin Gulf a chhuahsan ve tawh bawk.

US-Israel leh Iran indona a thlen hnuah, khawvela oil leh LNG phurtu lawngte tana tui kawng pawimawh, khawvel huapa oil supply zinga hmun ngaa ṭhena hmun khatten an paltlang a ngai ṭhin a, Strait of Hormuz hi Iran chuan a khar a ni. Strait khar vang hian khawvel huapin oil leh gas supply a bahlah a, a man pawh a san phah hle. Ram eng emaw zat chuan oil renchemna an kalpui mek tawh a ni.

Iran leh US chuan inremna siam tumin hma la mek mah se an la inbe rem thei lo a, Iran pawhin Strait of Hormuz pawh hi a la thunun chhunzawm reng a ni. Hormuz Strait khar a nih hnuah tun thla chhungin supertanker tlemte chauhin an la paltlang thei a, heng pawh hi Iran-in transit route hmang tura a tihah an kal a ni. Kar liam ta khan Very Large Crude Carriers (VLCCs) pathumin an lo kaltlang tawh bawk a, heng lawngte hian crude oil barrel mtd 6 an phur a, China leh South Korea lam an pan a ni. Nimina Strait paltlang, LNG tanker Fuwarit hian vawiinah Pakistan a thlen beisei a ni. He lawngah hian Bahama flag inzarin, Qatar aṭangin LNG hi a phur chhuak a ni. LNG tanker Al Rayyan hian June 27-ah China a thlen beisei a ni bawk. Hetih lai hian West Asia buaina a chhuah hnuah, Strait of Hormuz kal tlang tur lawng tam tham tak chu an la tangkhang mek a ni.