US-in Cuba hruaitu hlui Raul Castro thubuai siamsak

US chuan Cuba ram hruaitu hlui, Raul Castro chu kum 1996-a Cuba leh Florida inkara thlawk thlawhtheihna pahnih kah thlak a nih chungchangah, America mite thah tuma phiarru leh pawikhawihna dang thlenah puhin thubuai a siamsak. Thlawhtheihna tlaah hian Cuban-American pali an thi a ni.

Nilaini khan US Justice Department (DOJ) chua kum 94 mi ni tawh, Raul Castro lakah thubuai siamsak a nih thu hi a puang a, US mi thah tuma phiarru, tualthat leh thlawhtheihna kah thlaknaa inhnamhnawihah puh a ni. Castro bakah mi dang pali thubuai siamsak an ni bawk. He thil thleng lai hian Raul Castro hi a unaupa, Fidel Castro kaihhruai sorkar hnuaiah an ram armed forces hotu lu ber leh defence minister a ni a, khawvel ram hrang hrangte dem pawh a hlawh hle.

Acting Attorney General Todd Blanche chuan US leh president Trump chuan an mi leh sate beihna chu an theihnghilh ngai dawn lo tih a sawi. Castro laka thubuai siamsak hi US court-ah ngaihtuah tur a ni a, thiam loh chantir a nih chuan dam chhung lung-in tang tura hrem theih a ni ang.

Kum 1996 February 24 khan Cuba ram chhuahsan duhte ṭanpuitu pawl, Brothers to the Rescue thlawhtheihna pahnih chu Cuban Mig-29 fighter jet in a kapthla a, thlawhtheihnaa chuang mi palite hian thi a ni. He thil thleng hi hetihlai US president, Bill Clinton leh Congress chuan na taka demin, Cuban ram hrekna pawh an siam phah bawk.