Russia President Putin-a'n China a tlawh

Russia president Vladimir Putin chuan nimin khan China a tlawh a, Beijing-a Great Hall of the People-ah China president Xi Jinping chuan a lo lawm a ni. Hemi hnu hian ram hruaitu pahnihte hi an inkawm zui a ni. Putin chuan China premier Li Qiang pawh a hmu ang. Kar liam ta khan US president Donald Trump chuan China hi a lo tlawh tawh bawk a ni.

Vladimir Putin chuan pawn lam aṭanga nawrna leh boruak ṭha lo awm fo mah se, China nena an inlaichinna leh economy lama an thawh dunna chu a chak ṭha hle tih a sawi. Xi Jinping pawhin Russia nen inrintawnna thuk tak an neih zel thu leh, an inlaichinna ṭha tak chu nghet taka a kal zel thu a sawi.

Putin chuan Sino-Russian inṭhianṭhatna chu a kum 25-na a nih thu a sawi a, China hi ṭum eng emaw zat a lo tlawh tawh a, Xi nen pawh ṭum 40 chuang an inhmu tawh a ni. Putin hi Russia rama sumdawng lian leh sorkar lam hotu tam takin an zui a, a cham chhung hian Russia leh China thawh dunna tur inremna 40 vel an ziak dawn a ni. Inremna an siam tur hi economy bakah, tourism leh education thlengin a huam dawn nia tarlan a ni bawk.

Russia-Ukraine indona thleng vanga khawthlang ramten Russia hi hrek mah se, China hi Russia oil leitu ram lian ber a la ni reng a ni. Russia oil hi ni khatah barrel mtd 2.01 zel la lut ang a ni a, kum khat chhunga Russia-in China-a crude oil a thawn luh hi USD tld 61 man hu a tling.